Canada: ਦੋਹਰੇ ਕਤਲ ਕਾਂਡ ‘ਚ ਪੰਜਾਬੀ ਮੂਲ ਦੇ ਦੂਜੇ ਨੌਜਵਾਨ ਨੂੰ ਵੀ ਉਮਰ ਕੈਦ, 25 ਸਾਲ ਤੱਕ ਨਹੀਂ ਮਿਲੇਗੀ ਪੈਰੋਲ
ਚਾਰ ਹਫ਼ਤਿਆਂ ਤੱਕ ਚੱਲੇ ਮੁਕੱਦਮੇ ਤੋਂ ਬਾਅਦ ਸਤੰਬਰ ਵਿੱਚ ਇੱਕ ਜਿਊਰੀ ਵੱਲੋਂ ਦੋਵਾਂ ਵਿਅਕਤੀਆਂ ਨੂੰ ਦੋਸ਼ੀ ਠਹਿਰਾਇਆ ਗਿਆ ਸੀ
ਬ੍ਰਿਟਿਸ਼ ਕੋਲੰਬੀਆ ਦੇ ਵਿਸਲਰ ਵਿੱਚ ਇੱਕ ਹੋਟਲ ਦੇ ਬਾਹਰ ‘ਬ੍ਰਦਰਜ਼ ਕੀਪਰਜ਼’ ਗੈਂਗ ਦੇ ਮੈਂਬਰ ਅਤੇ ਉਸਦੇ ਦੋਸਤ ਦੇ 2022 ਵਿੱਚ ਹੋਏ ਦੋਹਰੇ ਕਤਲ ਵਿੱਚ ਭੂਮਿਕਾ ਨਿਭਾਉਣ ਲਈ ਪੰਜਾਬ ਨਾਲ ਸਬੰਧਤ ਭਾਰਤੀ ਮੂਲ ਦੇ ਇੱਕ ਦੂਜੇ ਵਿਅਕਤੀ ਨੂੰ ਉਮਰ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ। ਬ੍ਰਿਟਿਸ਼ ਕੋਲੰਬੀਆ ਦੀ ਸੁਪਰੀਮ ਕੋਰਟ ਨੇ ਸ਼ੁੱਕਰਵਾਰ ਨੂੰ ਗੁਰਸਿਮਰਨ ਸਹੋਤਾ (29) ਨੂੰ 24 ਜੁਲਾਈ, 2022 ਨੂੰ ਹੋਈ ਇੱਕ ਟਾਰਗੇਟਿਡ ਗੋਲੀਬਾਰੀ ਵਿੱਚ ਮਨਿੰਦਰ ਧਾਲੀਵਾਲ ਦੇ ਫਸਟ-ਡਿਗਰੀ ਕਤਲ ਅਤੇ ਉਸਦੇ ਦੋਸਤ ਸਤਿੰਦਰ ਗਿੱਲ ਦੇ ਸੈਕਿੰਡ-ਡਿਗਰੀ ਕਤਲ ਲਈ ਦੋ ਉਮਰ ਕੈਦ ਦੀਆਂ ਸਜ਼ਾਵਾਂ ਸੁਣਾਈਆਂ।
ਜਸਟਿਸ ਮੀਰੀਅਮ ਗ੍ਰੋਪਰ ਨੇ ਹੁਕਮ ਦਿੱਤਾ ਕਿ ਇਹ ਸਜ਼ਾਵਾਂ ਨਾਲੋ-ਨਾਲ ਚੱਲਣਗੀਆਂ। ਸਹੋਤਾ 25 ਸਾਲਾਂ ਤੱਕ ਪੈਰੋਲ ਲਈ ਯੋਗ ਨਹੀਂ ਹੋਵੇਗਾ। ਉਸ ਨੂੰ ਉਮਰ ਭਰ ਲਈ ਹਥਿਆਰ ਰੱਖਣ ‘ਤੇ ਪਾਬੰਦੀ ਅਤੇ ਡੀ.ਐਨ.ਏ. (DNA) ਆਰਡਰ ਵੀ ਸੁਣਾਇਆ ਗਿਆ ਹੈ। ਸਹੋਤਾ ਦੇ ਸਾਥੀ, 25 ਸਾਲਾ ਤਨਵੀਰ ਖੱਖ ਨੂੰ ਬੁੱਧਵਾਰ ਨੂੰ ਧਾਲੀਵਾਲ ਦੇ ਫਸਟ-ਡਿਗਰੀ ਕਤਲ ਲਈ ਉਮਰ ਕੈਦ ਦੀ ਸਜ਼ਾ ਸੁਣਾਈ ਗਈ ਸੀ, ਜਿਸ ਵਿੱਚ 25 ਸਾਲਾਂ ਤੱਕ ਪੈਰੋਲ ਦੀ ਕੋਈ ਸੰਭਾਵਨਾ ਨਹੀਂ ਹੈ।
ਚਾਰ ਹਫ਼ਤਿਆਂ ਤੱਕ ਚੱਲੇ ਮੁਕੱਦਮੇ ਤੋਂ ਬਾਅਦ ਸਤੰਬਰ ਵਿੱਚ ਇੱਕ ਜਿਊਰੀ ਵੱਲੋਂ ਦੋਵਾਂ ਵਿਅਕਤੀਆਂ ਨੂੰ ਦੋਸ਼ੀ ਠਹਿਰਾਇਆ ਗਿਆ ਸੀ। ਜਿੱਥੇ ਦੋਵਾਂ ਨੂੰ ਧਾਲੀਵਾਲ ਦੇ ਕਤਲ ਦਾ ਦੋਸ਼ੀ ਪਾਇਆ ਗਿਆ ਸੀ, ਉੱਥੇ ਹੀ ਗਿੱਲ ਦੇ ਕਤਲ ਵਿੱਚ ਇਕੱਲੇ ਸਹੋਤਾ ਨੂੰ ਦੋਸ਼ੀ ਠਹਿਰਾਇਆ ਗਿਆ ਸੀ। ਜਿਊਰੀ ਵੱਲੋਂ ਵਿਚਾਰ-ਵਟਾਂਦਰਾ ਸ਼ੁਰੂ ਕਰਨ ਤੋਂ ਪਹਿਲਾਂ ਜੱਜ ਨੇ ਖੱਖ ਨੂੰ ਦੂਜੇ ਕਤਲ ਦੇ ਦੋਸ਼ ਵਿੱਚੋਂ ਬਰੀ ਕਰਨ ਦੇ ਨਿਰਦੇਸ਼ ਦਿੱਤੇ ਸਨ।
ਇਹ ਦੋਹਰਾ ਕਤਲ ਵਿਸਲਰ ਵਿਲੇਜ ਦੇ ਸਨਡਾਇਲ ਹੋਟਲ ਦੇ ਬਾਹਰ ਵਾਪਰਿਆ ਸੀ। ਦੋਵਾਂ ਪੀੜਤਾਂ ਨੂੰ ਸਨਡਾਇਲ ਕ੍ਰੇਸੈਂਟ ਦੇ 4300 ਬਲਾਕ ਵਿੱਚ ਗੋਲੀ ਮਾਰੀ ਗਈ ਸੀ। ਇੱਕ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ ਸੀ, ਜਦੋਂ ਕਿ ਦੂਜੇ ਨੇ ਹਸਪਤਾਲ ਲਿਜਾਣ ਤੋਂ ਬਾਅਦ ਜ਼ਖ਼ਮਾਂ ਦੀ ਤਾਬ ਨਾ ਝੱਲਦਿਆਂ ਦਮ ਤੋੜ ਦਿੱਤਾ ਸੀ।
ਆਰ.ਸੀ.ਐਮ.ਪੀ. (RCMP) ਦੀ ਇੰਟੀਗ੍ਰੇਟਿਡ ਹੋਮੀਸਾਈਡ ਇਨਵੈਸਟੀਗੇਸ਼ਨ ਟੀਮ (IHIT) ਨੇ ਇਹ ਨਿਰਧਾਰਤ ਕੀਤਾ ਸੀ ਕਿ ਇਹ ਗੋਲੀਬਾਰੀ ਯੋਜਨਾਬੱਧ (ਟਾਰਗੇਟਿਡ) ਸੀ ਅਤੇ ਬ੍ਰਿਟਿਸ਼ ਕੋਲੰਬੀਆ ਵਿੱਚ ਚੱਲ ਰਹੀ ਗੈਂਗ ਵਾਰ ਨਾਲ ਜੁੜੀ ਹੋਈ ਸੀ। ਕੈਨੇਡੀਅਨ ਕਾਨੂੰਨ ਦੇ ਤਹਿਤ, ਫਸਟ-ਡਿਗਰੀ ਕਤਲ ਦੇ ਦੋਸ਼ ਵਿੱਚ ਆਪਣੇ ਆਪ ਉਮਰ ਕੈਦ ਦੀ ਸਜ਼ਾ ਹੁੰਦੀ ਹੈ, ਜਿਸ ਵਿੱਚ 25 ਸਾਲਾਂ ਬਾਅਦ ਪੈਰੋਲ ਦੀ ਯੋਗਤਾ ਮਿਲਦੀ ਹੈ। ਸੈਕਿੰਡ-ਡਿਗਰੀ ਕਤਲ ਦੇ ਦੋਸ਼ ਵਿੱਚ ਵੀ ਉਮਰ ਕੈਦ ਦੀ ਸਜ਼ਾ ਹੁੰਦੀ ਹੈ, ਜਿਸ ਵਿੱਚ ਪੈਰੋਲ ਦੀ ਯੋਗਤਾ ਦੀ ਮਿਆਦ ਅਦਾਲਤ ਵੱਲੋਂ ਤੈਅ ਕੀਤੀ ਜਾਂਦੀ ਹੈ।