Related Articles
Punjab – ਪੁਲਸ ਤੋਂ ਭੱਜਦੇ ਮੁਲਜ਼ਮ ਨੇ ਮਚਾਇਆ ਕਹਿਰ! 7 ਗੱਡੀਆਂ ਨੂੰ ਮਾਰ ਟੱਕਰ
ਲੁਧਿਆਣਾ : ਲੁਧਿਆਣਾ ਦੇ ਸ਼ਿਮਲਾਪੁਰੀ ਇਲਾਕੇ ਵਿਚ ਅੱਜ ਸਵੇਰੇ ਉਸ ਵੇਲੇ ਦਹਿਸ਼ਤ ਫੈਲ ਗਈ, ਜਦੋਂ ਇਕ ਚਿੱਟੇ ਰੰਗ ਦੀ ਬਲੇਨੋ ਕਾਰ ਨੇ ਗਲੀਆਂ ਵਿਚ ਮੌਤ ਦਾ ਤਾਂਡਵ ਮਚਾ ਦਿੱਤਾ। ਇਹ ਕੋਈ ਆਮ ਹਾਦਸਾ ਨਹੀਂ ਸੀ, ਸਗੋਂ ਇਕ ਸ਼ਾਤਰ ਕਾਰ ਚੋਰ ਦੀ ਪੁਲਸ ਦੇ ਚੁੰਗਲ ਵਿਚੋਂ ਨਿਕਲਣ ਦੀ ਕੋਸ਼ਿਸ਼ ਸੀ।
ਪੁਲਸ ਤੋਂ ਬਚਣ ਲਈ ਮੁਲਜ਼ਮ ਨੇ ਕਾਰ ਨੂੰ ਅਜਿਹੀ ਤੇਜ਼ ਰਫ਼ਤਾਰ ਦਿੱਤੀ ਕਿ ਰਸਤੇ ਵਿਚ ਜੋ ਵੀ ਆਇਆ ਉਹ ਮਲਬੇ ਵਿਚ ਤਬਦੀਲ ਹੁੰਦਾ ਗਿਆ। ਇਸ ਖ਼ਤਰਨਾਕ ਖੇਡ ਦੌਰਾਨ ਮੁਲਜ਼ਮ ਨੇ ਕਰੀਬ 7 ਵਾਹਨਾਂ ਨੂੰ ਟੱਕਰ ਮਾਰੀ ਅਤੇ ਅੰਤ ਵਿਚ ਇਕ ਘਰ ਦੀ ਕੰਧ ਅਤੇ ਬਿਜਲੀ ਦਾ ਖੰਭਾ ਤੋੜ ਕੇ ਹੀ ਉਸ ਦੀ ਕਾਰ ਰੁਕੀ।
ਮਿਲੀ ਜਾਣਕਾਰੀ ਅਨੁਸਾਰ ਸ਼ਿਮਲਾਪੁਰੀ ਇਲਾਕੇ ਤੋਂ ਇਕ ਬਲੇਨੋ ਕਾਰ ਚੋਰੀ ਹੋਈ ਸੀ, ਜਿਸ ਦੀ ਭਾਲ ਵਿਚ ਪੁਲਸ ਨੇ ਜਾਲ ਵਿਛਾਇਆ ਹੋਇਆ ਸੀ। ਐਤਵਾਰ ਸਵੇਰੇ ਕਰੀਬ 11.30 ਵਜੇ ਜਦੋਂ ਪੁਲਸ ਟੀਮ ਨੇ ਸ਼ੱਕੀ ਕਾਰ ਨੂੰ ਰੁਕਣ ਦਾ ਇਸ਼ਾਰਾ ਕੀਤਾ, ਤਾਂ ਮੁਲਜ਼ਮ ਡਰ ਗਿਆ ਅਤੇ ਉਸ ਨੇ ਆਤਮ-ਸਮਰਪਣ ਕਰਨ ਦੀ ਬਜਾਏ ਐਕਸੀਲੇਟਰ ‘ਤੇ ਪੈਰ ਰੱਖ ਦਿੱਤਾ ਅਤੇ ਦੁਸ਼ਹਿਰਾ ਗਰਾਊਂਡ ਦੀਆਂ ਤੰਗ ਗਲੀਆਂ ਵਿਚ ਮੌਤ ਦੀ ਰਫ਼ਤਾਰ ਨਾਲ ਭਜਾਉਣ ਲੱਗਿਆ।
ਖ਼ੁਦ ਨੂੰ ਚਾਰੇ ਪਾਸਿਓਂ ਪੁਲਸ ਨਾਲ ਘਿਰਿਆ ਦੇਖ ਕੇ ਮੁਲਜ਼ਮ ਨੇ ਕਾਰ ਨੂੰ ਹਿੰਸਕ ਤਰੀਕੇ ਨਾਲ ਭਜਾਉਣਾ ਸ਼ੁਰੂ ਕੀਤਾ ਅਤੇ ਸਭ ਤੋਂ ਪਹਿਲਾਂ ਇਕ ਬੁਲੇਟ ਅਤੇ ਬਾਈਕ ਨੂੰ ਹਵਾ ਵਿਚ ਉਛਾਲ ਦਿੱਤਾ।
ਵਾਰਦਾਤ ਦਾ ਮੰਜ਼ਰ ਇੰਨਾ ਖ਼ੌਫ਼ਨਾਕ ਸੀ ਕਿ ਮੁਲਜ਼ਮ ਨੇ ਰਸਤੇ ਵਿਚ ਆ ਰਹੀਆਂ ਦੋ ਐਕਟਿਵਾ, ਇਕ ਆਟੋ ਅਤੇ ਖੜ੍ਹੀਆਂ ਦੋ ਹੋਰ ਗੱਡੀਆਂ ਨੂੰ ਵੀ ਬੁਰੀ ਤਰ੍ਹਾਂ ਨੁਕਸਾਨਿਆ। ਚਸ਼ਮਦੀਦਾਂ ਮੁਤਾਬਕ ਕਾਰ ਦੀ ਰਫ਼ਤਾਰ ਇੰਨੀ ਤੇਜ਼ ਸੀ ਕਿ ਉਹ ਇਕ ਘਰ ਦੀ ਕੰਧ ਪਾੜਦੀ ਹੋਈ ਸਿੱਧੀ ਬਿਜਲੀ ਦੇ ਖੰਭੇ ਵਿਚ ਜਾ ਵੱਜੀ, ਜਿਸ ਕਾਰਨ ਖੰਭਾ ਵਿਚਕਾਰੋਂ ਟੁੱਟ ਗਿਆ ਅਤੇ ਕਾਰ ਚਕਨਾਚੂਰ ਹੋ ਗਈ।
ਪੁਲਸ ਨੇ ਮੁਲਜ਼ਮ ਨੂੰ ਮਲਬਾ ਬਣ ਚੁੱਕੀ ਕਾਰ ਵਿਚੋਂ ਬਾਹਰ ਕੱਢ ਕੇ ਦਬੋਚ ਲਿਆ। ਐੱਸ.ਐੱਚ.ਓ. ਨੇ ਪੁਸ਼ਟੀ ਕੀਤੀ ਹੈ ਕਿ ਮੁਲਜ਼ਮ ਹਿਰਾਸਤ ਵਿਚ ਹੈ ਅਤੇ ਉਸ ਤੋਂ ਪੁੱਛਗਿੱਛ ਕੀਤੀ ਜਾ ਰਹੀ ਹੈ ਕਿ ਇਸ ਚੋਰੀ ਵਿਚ ਹੋਰ ਕੌਣ ਸ਼ਾਮਲ ਸੀ। ਇਸ ਪੂਰੇ ਡਰਾਮੇ ਵਿਚ ਕਿਸੇ ਦੀ ਜਾਨ ਨਹੀਂ ਗਈ, ਪਰ ਲੋਕਾਂ ਦੇ ਵਾਹਨਾਂ ਦਾ ਭਾਰੀ ਨੁਕਸਾਨ ਹੋਇਆ ਹੈ।
