Related Articles
Jasmine Sandlas ਨੇ ਦਿੱਲੀ ਕੰਸਰਟ ਦੌਰਾਨ ਮੰਗਣੀ ਦਾ ਕੀਤਾ ਐਲਾਨ; ਸਟੇਜ ’ਤੇ ਪਹੁੰਚਿਆ ‘ਗੁਲਾਬੀ ਕੁਈਨ’ ਦਾ ਹਮਸਫ਼ਰ
‘ਦਿਸ ਇਜ਼ ਮਾਈ ਮੈਨ’: ਗਾਇਕਾ Jasmine Sandlas ਨੇ ਦਿੱਲੀ ਕੰਸਰਟ ਦੌਰਾਨ ਮੰਗਣੀ ਦਾ ਕੀਤਾ ਐਲਾਨ; ਸਟੇਜ ’ਤੇ ਪਹੁੰਚਿਆ ‘ਗੁਲਾਬੀ ਕੁਈਨ’ ਦਾ ਹਮਸਫ਼ਰ
‘ਦਿ ਡ੍ਰੀਮ ਗਰਲ ਇੰਡੀਆ ਟੂਰ’ ਦੇ ਪਹਿਲੇ ਹੀ ਸ਼ੋਅ ‘ਚ ਮੰਗੇਤਰ ਸ਼ੇਖਰ ਚੌਧਰੀ ਨੂੰ ਸਟੇਜ ’ਤੇ ਬੁਲਾ ਕੇ ਪ੍ਰਸ਼ੰਸਕਾਂ ਨੂੰ ਦਿੱਤਾ ਵੱਡਾ ਸਰਪ੍ਰਾਈਜ਼; ‘ਲਾਵਾਂ’ ਗੀਤ ’ਤੇ ਕੀਤਾ ਰੋਮਾਂਟਿਕ ਡਾਂਸ
ਪੰਜਾਬੀ ਅਤੇ ਬੌਲੀਵੁੱਡ ਮਿਊਜ਼ਿਕ ਇੰਡਸਟਰੀ ਦੀ ਮਸ਼ਹੂਰ ਗਾਇਕਾ ਜੈਸਮੀਨ ਸੈਂਡਲਾਸ ਨੇ ਦਿੱਲੀ ਵਿਖੇ ਆਪਣੇ ਲਾਈਵ ਕੰਸਰਟ ਦੌਰਾਨ ਪ੍ਰਸ਼ੰਸਕਾਂ ਨੂੰ ਉਸ ਵੇਲੇ ਵੱਡਾ ਸਰਪ੍ਰਾਈਜ਼ ਦਿੱਤਾ, ਜਦੋਂ ਉਨ੍ਹਾਂ ਨੇ ਸਟੇਜ ਤੋਂ ਆਪਣੀ ਮੰਗਣੀ ਦਾ ਅਧਿਕਾਰਤ ਐਲਾਨ ਕਰ ਦਿੱਤਾ। ਸ਼ਨੀਵਾਰ ਰਾਤ ਦਿੱਲੀ ਦੇ ਯਸ਼ੋਭੂਮੀ ਕਨਵੈਨਸ਼ਨ ਸੈਂਟਰ ਵਿਖੇ ਆਪਣੇ ‘ਦਿ ਡ੍ਰੀਮ ਗਰਲ ਇੰਡੀਆ ਟੂਰ’ ਦੀ ਸ਼ੁਰੂਆਤ ਕਰਦਿਆਂ ਜੈਸਮੀਨ ਨੇ ਨਾ ਸਿਰਫ਼ ਆਪਣੀ ਮੰਗਣੀ ਦੀ ਅੰਗੂਠੀ ਦਿਖਾਈ, ਬਲਕਿ ਆਪਣੇ ਮੰਗੇਤਰ ਸ਼ੇਖਰ ਚੌਧਰੀ ਨੂੰ ਸਟੇਜ ‘ਤੇ ਬੁਲਾ ਕੇ ਸਭ ਦੇ ਸਾਹਮਣੇ ਪੇਸ਼ ਵੀ ਕੀਤਾ।
ਸੋਸ਼ਲ ਮੀਡੀਆ ’ਤੇ ਵਾਇਰਲ ਹੋ ਰਹੀ ਵੀਡੀਓ
ਸੋਸ਼ਲ ਮੀਡੀਆ ’ਤੇ ਵਾਇਰਲ ਹੋ ਰਹੀਆਂ ਵੀਡੀਓਜ਼ ਵਿੱਚ ਜੈਸਮੀਨ ਬੇਹੱਦ ਭਾਵੁਕ ਅਤੇ ਖ਼ੁਸ਼ ਨਜ਼ਰ ਆ ਰਹੀ ਹੈ। ਲਾਈਵ ਸ਼ੋਅ ਦੌਰਾਨ ਸ਼ੇਖਰ ਚੌਧਰੀ ਦਾ ਹੱਥ ਫੜ ਕੇ ਜੈਸਮੀਨ ਨੇ ਉਤਸ਼ਾਹਿਤ ਭੀੜ ਨੂੰ ਕਿਹਾ, “ਇਹ ਉਹ ਇਨਸਾਨ ਹੈ ਜਿਸ ਨੇ ਮੈਨੂੰ ਅੰਗੂਠੀ ਪਹਿਨਾਈ ਹੈ। ਸਾਰਿਆਂ ਨੂੰ ਦੱਸ ਦਿਆਂ, ਇਹ ਮੇਰਾ ਹਮਸਫ਼ਰ (ਮਾਈ ਮੈਨ) ਹੈ!” ਇਸ ਤੋਂ ਬਾਅਦ ਦੋਵਾਂ ਨੇ ਸਟੇਜ ’ਤੇ ਇੱਕ-ਦੂਜੇ ਨੂੰ ਗਲੇ ਲਗਾਇਆ ਅਤੇ ਜੈਸਮੀਨ ਦੇ ਮਸ਼ਹੂਰ ਗੀਤ ‘ਲਾਵਾਂ’ ’ਤੇ ਰੋਮਾਂਟਿਕ ਡਾਂਸ ਕੀਤਾ, ਜਿਸ ਨੂੰ ਦੇਖ ਕੇ ਹਾਲ ਵਿੱਚ ਮੌਜੂਦ ਹਜ਼ਾਰਾਂ ਪ੍ਰਸ਼ੰਸਕਾਂ ਨੇ ਤਾੜੀਆਂ ਨਾਲ ਅਸਮਾਨ ਗੁੰਜਾ ਦਿੱਤਾ। ਸਟੇਜ ਛੱਡਣ ਤੋਂ ਪਹਿਲਾਂ ਸ਼ੇਖਰ ਨੇ ਜੈਸਮੀਨ ਨੂੰ ਫਲਾਇੰਗ ਕਿਸ (Flying Kiss) ਦਿੱਤੀ, ਜਿਸ ਤੋਂ ਬਾਅਦ ਗਾਇਕਾ ਆਪਣੇ ਹੰਝੂ ਰੋਕ ਨਾ ਸਕੀ।’
ਆਪਣੇ ਸੁਪਰਹਿੱਟ ਗਾਣਿਆਂ ਨਾਲ ਜੈਸਮੀਨ ਨੇ ਦਿੱਲੀ ਵਾਸੀਆਂ ਨੂੰ ਖ਼ੂਬ ਨਚਾਇਆ
ਇਸ ਸ਼ਾਨਦਾਰ ਕੰਸਰਟ ਵਿੱਚ ਜੈਸਮੀਨ ਨੇ ਸੁਨਹਿਰੀ ਰੰਗ ਦਾ ਲਹਿੰਗਾ ਅਤੇ ਭਾਰੀ ਜਿਊਲਰੀ ਪਹਿਨੀ ਹੋਈ ਸੀ। ਉਨ੍ਹਾਂ ਨੇ ਆਪਣੇ ਸੁਪਰਹਿੱਟ ਗੀਤਾਂ ਜਿਵੇਂ ‘ਤਰਸ’, ‘ਇਲੀਗਲ ਵੈਪਨ’, ‘ਪੰਜੇਬਾਂ’ ਅਤੇ ‘ਸਿਪ ਸਿਪ’ ਨਾਲ ਦਿੱਲੀ ਵਾਸੀਆਂ ਨੂੰ ਨਚਾਇਆ। ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਆਪਣੀ ਸੁਪਰਹਿੱਟ ਐਲਬਮ ‘ਧੁਰੰਧਰ’ ਦੇ ਚਰਚਿਤ ਗੀਤ ‘ਸ਼ਰਾਰਤ’ ਅਤੇ ‘ਜਾਈਏ ਸੱਜਣਾ’ ਵੀ ਗਾਏ। ਦਿੱਲੀ ਦੇ ਇਸ ਸਫ਼ਲ ਸ਼ੋਅ ਤੋਂ ਬਾਅਦ ਜੈਸਮੀਨ ਹੁਣ 18 ਜੁਲਾਈ ਨੂੰ ਮੁੰਬਈ, 25 ਜੁਲਾਈ ਨੂੰ ਬੈਂਗਲੁਰੂ ਅਤੇ 29 ਅਗਸਤ ਨੂੰ ਚੰਡੀਗੜ੍ਹ ਵਿਖੇ ਆਪਣੀ ਆਵਾਜ਼ ਦਾ ਜਾਦੂ ਬਿਖੇਰੇਗੀ।
ਜ਼ਿਕਰਯੋਗ ਹੈ ਕਿ ਜਲੰਧਰ ਵਿੱਚ ਜਨਮੀ ਅਤੇ ਕੈਲੀਫੋਰਨੀਆ (ਸਟਾਕਟਨ) ਵਿੱਚ ਪਲੀ-ਵਧੀ ਜੈਸਮੀਨ ਸੈਂਡਲਾਸ ਨੇ 2007 ਵਿੱਚ ਗੀਤ ‘ਮੁਸਕਾਨ’ ਨਾਲ ਆਪਣੇ ਕਰੀਅਰ ਦੀ ਸ਼ੁਰੂਆਤ ਕੀਤੀ ਸੀ। ਉਨ੍ਹਾਂ ਨੂੰ ਬੌਲੀਵੁੱਡ ਵਿੱਚ ਵੱਡੀ ਪਛਾਣ ਸਲਮਾਨ ਖ਼ਾਨ ਦੀ ਫ਼ਿਲਮ ‘ਕਿੱਕ’ (2014) ਦੇ ਗੀਤ ‘ਯਾਰ ਨਾ ਮਿਲੇ’ ਤੋਂ ਮਿਲੀ। ਹਾਲ ਹੀ ਦੇ ਸਾਲਾਂ ਵਿੱਚ ਵੀ ਉਨ੍ਹਾਂ ਨੇ ਫ਼ਿਲਮ ‘ਮੁੰਜਿਆ’ (2024) ਦੇ ਗੀਤ ‘ਤਰਸ’ ਅਤੇ ਸਾਲ 2025-2026 ਦੌਰਾਨ ਆਈਆਂ ਆਪਣੀਆਂ ਐਲਬਮਾਂ ‘ਧੁਰੰਧਰ’ ਅਤੇ ‘ਧੁਰੰਧਰ: ਦਿ ਰਿਵੇਂਜ’ ਦੇ ਗੀਤਾਂ ‘ਮੈਂ ਔਰ ਤੂ’ ਅਤੇ ‘ਜਾਈਏ ਸੱਜਣਾ’ ਰਾਹੀਂ ਸੰਗੀਤ ਜਗਤ ਵਿੱਚ ਆਪਣੀ ਸਰਦਾਰੀ ਕਾਇਮ ਰੱਖੀ ਹੈ। ਪ੍ਰਸ਼ੰਸਕਾਂ ਵੱਲੋਂ ਹੁਣ ਇਸ ਨਵੀਂ ਜੋੜੀ ਨੂੰ ਸੋਸ਼ਲ ਮੀਡੀਆ ’ਤੇ ਲਗਾਤਾਰ ਵਧਾਈਆਂ ਦਿੱਤੀਆਂ ਜਾ ਰਹੀਆਂ ਹਨ।