Related Articles
Epstein files
ਕੀ ਮੋਦੀ, ਜੇਤਲੀ ਅਤੇ ਐਪਸਟੀਨ ਦੀ ਕਦੇ ਮੁਲਾਕਾਤ ਹੋਈ ਸੀ? ਕਾਂਗਰਸ ਨੇ ਕੇਂਦਰ ਸਰਕਾਰ ਤੋਂ ਮੰਗੇ ਜਵਾਬ
Jeffrey Epstein ਦੀਆਂ ਈਮੇਲਾਂ ਵਿੱਚ ਮੋਦੀ ਅਤੇ ਅਰੁਣ ਜੇਤਲੀ ਦੇ ਨਾਮ ਸਾਹਮਣੇ ਆਉਣ ਤੋਂ ਬਾਅਦ ਸਿਆਸੀ ਹਲਚਲ ਤੇਜ਼
ਕਾਂਗਰਸ ਪਾਰਟੀ ਨੇ ਸ਼ੁੱਕਰਵਾਰ ਨੂੰ ਅਮਰੀਕੀ ਵਿੱਤਕਾਰ ਅਤੇ ਜਿਨਸੀ ਅਪਰਾਧੀ ਜੈਫਰੀ ਐਪਸਟੀਨ (Jeffrey Epstein) ਨਾਲ ਜੁੜੀਆਂ ਈਮੇਲਾਂ ਦਾ ਹਵਾਲਾ ਦਿੰਦੇ ਹੋਏ ਭਾਜਪਾ ਸਰਕਾਰ ’ਤੇ ਤਿੱਖੇ ਨਿਸ਼ਾਨੇ ਸਾਧੇ। ਕਾਂਗਰਸ ਆਗੂ ਪਵਨ ਖੇੜਾ ਨੇ ਦਾਅਵਾ ਕੀਤਾ ਕਿ 2014 ਵਿੱਚ ਨਰਿੰਦਰ ਮੋਦੀ ਦੇ ਪ੍ਰਧਾਨ ਮੰਤਰੀ ਵਜੋਂ ਸਹੁੰ ਚੁੱਕਣ ਦੇ ਮਹਿਜ਼ 10 ਦਿਨਾਂ ਬਾਅਦ ਹੀ ਐਪਸਟੀਨ ਨੇ ਭਾਰਤ ਵਿੱਚ ਦਿਲਚਸਪੀ ਦਿਖਾਉਣੀ ਸ਼ੁਰੂ ਕਰ ਦਿੱਤੀ ਸੀ।
ਖੇੜਾ ਨੇ 5 ਜੂਨ 2014 ਦੀ ਇੱਕ ਈਮੇਲ ਦਾ ਜ਼ਿਕਰ ਕੀਤਾ ਜਿਸ ਵਿੱਚ ਐਪਸਟੀਨ ਨੇ ਅਮਰੀਕੀ ਅਰਬਪਤੀ ਟੌਮ ਪ੍ਰਿਟਜ਼ਕਰ ਨੂੰ ਲਿਖਿਆ ਸੀ, “ਕੀ ਸਾਨੂੰ ਭਾਰਤ ਨੂੰ ਇੱਕਠੇ ਕਰਨਾ ਚਾਹੀਦਾ ਹੈ, ਜੇਤਲੀ ਅਤੇ ਮੋਦੀ।” ਕਾਂਗਰਸ ਦਾ ਕਹਿਣਾ ਹੈ ਕਿ ਇੱਕ ਸਜ਼ਾਯਾਫ਼ਤਾ ਮੁਜਰਿਮ ਦੀ ਭਾਰਤ ਦੇ ਚੋਟੀ ਦੇ ਲੀਡਰਾਂ ਵਿੱਚ ਅਜਿਹੀ ਦਿਲਚਸਪੀ ਕਈ ਗੰਭੀਰ ਸਵਾਲ ਖੜ੍ਹੇ ਕਰਦੀ ਹੈ।
ਖੇੜਾ ਨੇ ਅੱਗੇ ਇਲਜ਼ਾਮ ਲਾਇਆ ਕਿ ਇਹ ਸਿਰਫ਼ ਇੱਕ ਇਤਫ਼ਾਕ ਨਹੀਂ ਸੀ, ਸਗੋਂ ਐਪਸਟੀਨ ਦੇ ਕੌਮਾਂਤਰੀ ਨੈੱਟਵਰਕ ਦਾ ਭਾਰਤੀ ਸਿਆਸਤ ਵਿੱਚ ਦਖਲ ਦੇਣ ਦੀ ਇੱਕ ਵੱਡੀ ਕੋਸ਼ਿਸ਼ ਸੀ। ਉਨ੍ਹਾਂ ਨੇ ਹਰਦੀਪ ਸਿੰਘ ਪੁਰੀ, ਅਨਿਲ ਅੰਬਾਨੀ ਅਤੇ ਬਿਲ ਗੇਟਸ ਨਾਲ ਜੁੜੀਆਂ ਐਪਸਟੀਨ ਦੀਆਂ ਹੋਰ ਗੱਲਬਾਤਾਂ ਦਾ ਵੀ ਹਵਾਲਾ ਦਿੱਤਾ।
ਕਾਂਗਰਸ ਨੇ ਸਵਾਲ ਕੀਤਾ ਹੈ ਕਿ ਕੀ ਮੋਦੀ, ਜੇਤਲੀ ਅਤੇ ਐਪਸਟੀਨ ਵਿਚਕਾਰ ਕਦੇ ਕੋਈ ਸਿਆਸੀ, ਵਿੱਤੀ ਜਾਂ ਨਿੱਜੀ ਮੁਲਾਕਾਤ ਹੋਈ ਸੀ? ਪਾਰਟੀ ਨੇ ਸਰਕਾਰ ਤੋਂ ਸਪੱਸ਼ਟੀਕਰਨ ਮੰਗਿਆ ਹੈ ਕਿ ਆਖਰ ਨਵੀਂ ਬਣੀ ਭਾਜਪਾ ਸਰਕਾਰ ਵਿੱਚ ਅਜਿਹਾ ਕੀ ਸੀ ਜਿਸ ਨੇ ਐਪਸਟੀਨ ਵਰਗੇ ਵਿਅਕਤੀ ਦਾ ਧਿਆਨ ਖਿੱਚਿਆ।
